المعلم .. وهيبته ... في المجتمع المصري

كنا بنسمع زمان عن المعلم ومكانته وهيبته في المجتمع .. كان اجدادنا يحكولنا كنا نشوف المدرس ماشي نحاول نستخبى أحسن يشفنا بالرغم إن كان المعلم ولا بيضرب ولا حاجة ولكن هي هيبة كده كانت في نفوسنا للمدرس . .. لأننا كنا بنحترم كل إللي بيعلمنا ، أبونا ، وجدنا وسيدنا ، في الكتاب ,, فكان المعلم له نفس المهابة بتاعة ابويا وجدي إن لم تكن تعلو في بعض الأحيان .. المهم إن كانت هيبة المدرس مزروعة في نفوس المجتمع .. وكانت مهنة معلم يتمناها كل واحد .. ويقول يا سلااااااام نفسى أطلع معلم ..
حتى الشعراء في شعرهم اتكلموا عن المعلم .. وكلنا حافظين قصيدة أمير الشعراء أحمد شوقي لما قال : قم للمعلم وفه التبجيلا .. كاد المعلم أن يكون رسولا ..
أما الآن فقد تفنن وزراء التربية والتعليم بداية من أحمد فتحي سرور مرورا بـ حسين كامل بهاء الدين ثم يسري الجمل .. في ضياع هذه الهيبة .. وأصبحت مهنة التعليم من أحقر المهن في المجتمع حتى إن الواحد بيستعر يقول إنه مدرس .. ويتباهى كل طالب بأنه ضرب المدرس فلان علقة سخنة .. والطالبة فلانة ضربت الأبلة فلانة بالشبشب ,, وشوية بلطجية يدخلوا المدرسة ويضربوا المدرسين فيها ويكسروا التخت على دماغ المدير .. ويسلام بقى لو ولي أمر أو طالب اشتكى مدرس أو مدرسة في قسم الشرطة يتعامل المدرس كأنه إرهابي وفين يوجعك .. ولأ ومدرسة جالها شلل نصفي بسب إهانة الطالبة البلطجية ليها وراحت المستشفى ومحدش خدلها حقها .. ولا فيه نقابة معلمين ولا يحزنون .. بصراحة أنا مخنوق أوي .. هو ده المعلم إللي بيطلع من تحت إيده الرئيس والوزير والدكتور والمهندس والمحامي والمدرس ,, إلخ .. يعني مفيش وزير يفتكر إنه علمه معلم ومفيش ظابط يفتكر إن كان له معلم يبدرسله .. واكتملت الإهانة لما ارتفت الأسعار والدنيا غليت والناس مش لاقية تاكل .. والمدرس مرتبه ميجيش زي الكناس إللي بيشتغل في الشارع .. مع احترامي الكبير لعملهم .. الكناس بياخد على الأقل 400 جنيه في الشهر غير لما واحد بيه بعربية فخمة يديلوا 10 جنيه ولا حاجة .. المعلم وأنا هاتكلم عن نفسي أنا .. والله والله . باخد مرتبي شامل الحوافز والزيادات وكل حاجة 376 جنيه .. وبقالي 5 سنين في التعليم يعني الكناس برده بياخد أكتر مني .. ما علينا !!! ، المهم إن الناس اتكلمت المرتبات بتاع الموظفيبن لازم تزيد عشان نواجه الزيادة الجنونية في الأسعار ,, طبعا من ضمن الموظفين دول المعلمين .. نادت الأقلام والكتاب إن مش هاينفع إن احنا نحسن التعليم غير لم نحسن مستوى المعلم .. ده شيئ تمام .. ونحسنه ازاي ؟؟ سؤال عايز إجابة !!
أولا نحسن مستواه ماديا نعمله كادر زي داكاترة الجامعة .. لأنه يستاهل ده بيطلع كل اصحاب المهن التانية .. وبعدين نحسن مستواه مهنيا .. ازاي نعمله تدريب ومهارات وننشئ أكاديمية خاصة ليه وهكذا ..
جت المهن التانية احتجت ,, الأطباء عايزين كادر .. وبتوع الأزهر عايزين كادر .. بتوع الضرايب العقارية .. وبتوع الصرف الصحي .. والحكاية اتقلبت على الحكومة .. خاصة إن هما كان ناوين يطبقوا الكادر على المعلم أبو طباشيرة بس .. نط لهم الإداريين والأخصائيين والمعاونين والعمال .. عايزين في الكادر احنا كمان ..
طيب الحكومة تخلص من الورطة دي ازاي ؟؟... ندي المعلمين 50% من الكادر والباقي لما الميزانية تسمح .. طيب ده الريس وعد في برنامجه الانتخابي إن يطبق كادر المعلم !!
آه ما احنا هانطبقه بس شوية شوية .. يعني نعمل امتحان للمعلم بس يكون حاجة مش مفهومة عشان يسقطوا ومنديهمش حاجة .. طب ازاي وفيه معلمين بقالهم في التعليم سنين كتير .. أكيد هاينجحوا ويحطونا في ورطة .. قامت الحكومة متمثلة في وزير التربية والتعليم فكرت .. نعمل 3 اختبارات مختلفين بحيث إذا عدا في واحد إللي هو التخصص ميعديش في التاني وهكذا ... بكده نكون حاولنا نحسن وضع المدرسين .. مهنيا بالامتحانات .. وماديا بفلوس الكادر .. وإللي ما ينجحش قداموا سنتين ولما يسقط فيهم نعملوا دورة تدريبة تانية وبعد أربع سنين يكون الوزارة اتشالت أوجه وزير تاني .. أو حصل انتخابات رئاسية جديدة .. وكل سنة وانتم طيبين يا معلمين مصر .. ما فيش كادر وهاتفضلوا زي مانتوا لأن المعلم يستحق أحقر مكانة في المجتمع هو ده شعار الأكاديمية المزعومة بتاعتهم .. النصيبة السودا إن الكل الموظفين زادت مرتباتهم من غير امتحانات .. حتى مدرسين الأزهر خدوا الكادر من غير امتحانات .. مش عارف ناوين يعملوا إيه فينا تاني !!! حد يفهمني .. أنا خلاص تعبت !!!
يا ريت إللي عنده كلمة أو حل يقوله .. اتكلموا أحسن تموتوا من الغيظ قولو رأيكم إيه ؟؟؟ !!!!